O'zbekiston yangiliklari

Davrda.davrdan...:   Select date in calendar   gacha:   Select date in calendar    
05.04.2017 | 15:43 Samimiy va o‘zaro ishonch ruhidagi uchrashuv
O‘zbekiston Respublikasi Prezidenti Shavkat Mirziyoyev Rossiya Federatsiyasi hukumati Raisi Dmitriy Medvedev bilan uchrashdi.  Dmitriy Medvedev Shavkat Mirziyoyevning Rossiya Federatsiyasiga tashrifidan minnatdor ekanligini bildirdi.  – O‘zbekiston Rossiyaning eng ishonchli hamkorlaridan biri, – dedi Dmitriy Medvedev. – Ikki davlat turli sohalarda ishonchli hamkorlik qilib kelmoqda. Sizning tashrifingiz davomida juda katta loyihalar bo‘yicha kelishuvlarga erishish ko‘zda tutilgan. Men tashrifingiz samarali bo‘ladi va ikki do‘st davlatning hamkorligida yangi sahifa ochiladi, deb ishonaman. 
05.04.2017 | 15:40 Shavkat Mirziyoyev Moskvadagi «Noma’lum askar» yodgorligiga gul qo‘ydi
O‘zbekiston Respublikasi Prezidenti Shavkat Mirziyoyev 5-aprel kuni Moskva shahridagi “Noma’lum askar” yodgorligiga gul qo‘ydi.  Mazkur yodgorlik Ikkinchi jahon urushida halok bo‘lgan Vatan himoyachilari xotirasiga bag‘ishlab bunyod etilgan.  Shavkat Mirziyoyev tinchlik, ozodlik yo‘lida jon fido qilgan vatanparvar insonlar xotirasiga hurmat bajo keltirdi.  
05.04.2017 | 12:22 O‘zbekiston Prezidenti Shavkat Mirziyoyev Moskvaga keldi
O‘zbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putinning taklifiga binoan 4-aprel kuni davlat tashrifi bilan Moskvaga keldi.  Ikki davlat bayroqlari bilan bezatilgan “Vnukovo-2” aeroportida oliy martabali mehmon sharafiga faxriy qorovul saf tortdi. Davlatimiz rahbarini Rossiya Federatsiyasi hukumati a’zolari kutib oldi.  Shavkat Mirziyoyev va Vladimir Putin O‘zbekiston bilan Rossiya o‘rtasidagi strategik sheriklik va ittifoqchilik munosabatlarini mustahkamlash, siyosiy, savdo-iqtisodiy, investitsiyaviy, transport-kommunikatsiya, ilmiy-texnik, madaniy-gumanitar va boshqa sohalardagi o‘zaro manfaatli hamkorlikni rivojlantirish masalalarini muhokama qiladilar, tomonlarni qiziqtirgan mintaqaviy va xalqaro ahamiyatga molik muammolar yuzasidan fikr almashadilar.  Mamlakatimiz Prezidentining davlat tashrifi chog‘ida ikki davlat Prezidentlarining Qo‘shma bayonoti, O‘zbekiston bilan Rossiyaning turli sohalardagi hamkorligini yanada rivojlantirishga qaratilgan 50 dan ortiq hujjat imzolanishi mo‘ljallangan. 
03.04.2017 | 20:55 Rossiya Federatsiyasi Prezidenti Vladimir Putin Janobi Oliylariga
Muhtaram Vladimir Vladimirovich! Sankt-Peterburg metrosida ro‘y bergan portlash oqibatida insonlar halok bo‘lgani haqidagi xabar meni chuqur qayg‘uga soldi. Mening chuqur ta’ziyamni qabul qilgaysiz. Halok bo‘lganlar va jabrlanganlarning oila a’zolari va yaqinlariga mening chuqur hamdardligimni yetkazishingizni so‘rayman. Qayg‘u bilan, 
03.04.2017 | 15:51 O‘zbekiston Prezidentining Rossiyaga davlat tashrifi to‘g‘risida
O‘zbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putinning taklifiga binoan 2017-yilning 4-5-aprel kunlari davlat tashrifi bilan Rossiyada bo‘ladi.  Rossiya rahbariyati bilan uchrashuv va muzokaralarda O‘zbekiston bilan Rossiya o‘rtasidagi strategik sheriklik va ittifoqchilik munosabatlarini mustahkamlashga qaratilgan keng ko‘lamli masalalar, siyosiy, savdo-iqtisodiy, investitsiyaviy, transport-kommunikatsiya, ilmiy-texnik, madaniy-gumanitar va boshqa sohalardagi o‘zaro manfaatli hamkorlikni rivojlantirish istiqbollari atroflicha muhokama qilinadi. 
30.03.2017 | 14:00 O‘zbekiston Respublikasi Oliy Majlisi Senatining to‘qqizinchi yalpi majlisi to‘g‘risida axborot
2017-yil 29-mart kuni Toshkent shahrida O‘zbekiston Respublikasi Oliy Majlisi Senatining to‘qqizinchi yalpi majlisi o‘z ishini davom ettirdi. Senatorlar ishni O‘zbekiston Respublikasi Bosh prokurorining O‘zbekiston Respublikasi prokuratura organlarining 2016-yildagi faoliyati to‘g‘risidagi hisobotini eshitishdan boshladilar. Hisobotda qayd etilganidek, 2016-yilda qonuniylikni ta’minlash, fuqarolarning huquqlari va erkinliklarini, jamiyat hamda davlatning qonun bilan qo‘riqlanadigan manfaatlarini himoya qilish, huquqbuzarliklarning oldini olish borasida prokuratura organlari tomonidan katta ishlar amalga oshirildi. Xususan, aholini ijtimoiy himoyalashga, fuqarolarning salomatligini muhofaza qilishga doir qonun hujjatlari ijro etilishi, “Sog‘lom ona va bola yili” Davlat dasturi, Ish o‘rinlari tashkil etish va aholi bandligini ta’minlash dasturi, Investitsiya dasturi bajarilishi muntazam nazorat qilib borildi. Hisobot yilida tadbirkorlik subyektlarini ishonchli huquqiy himoya qilish prokuratura organlari faoliyatining eng muhim ustuvor yo‘nalishlaridan biri bo‘ldi. Tadbirkorlarning, shu jumladan, tadbirkorlarga xizmat ko‘rsatuvchi davlat organlari mansabdor shaxslarining huquqiy bilimlarini oshirish yuzasidan 43 mingdan ortiq tadbir o‘tkazildi. Nazorat tadbirlari davomida tadbirkorlik subyektlari huquqlari buzilgan 19 752 ta holat, shu jumladan, ularning faoliyatiga noqonuniy aralashilgan 129 ta holat, noqonuniy tekshiruv o‘tkazilgan 54 ta holat, noqonuniy qarorlar qabul qilingan 1 657 ta holat, ortiqcha yig‘imlar undirilgan 657 ta holat, jismoniy va yuridik shaxslar murojaatlarini ko‘rib chiqishda qonun hujjatlari buzilgan 887 ta holat aniqlandi. Ushbu holatlar bo‘yicha prokuratura tomonidan tegishli choralar ko‘rildi. 
30.03.2017 | 12:55 O‘zbekiston Respublikasi Oliy Majlisi Senatining to‘qqizinchi yalpi majlisi to‘g‘risida axborot
2017-yil 28-mart kuni Toshkent shahrida O‘zbekiston Respublikasi Oliy Majlisi Senatining to‘qqizinchi yalpi majlisi ochildi. Majlisda Vazirlar Mahkamasining taklif etilgan a’zolari, vazirliklar va idoralar rahbarlari, boshqa tashkilotlar, ommaviy axborot vositalari vakillari ishtirok etdilar.  Majlisni Oliy Majlis Senatining Raisi N.Yo‘ldoshev olib bordi.  Senatorlar ishni “O‘zbekiston Respublikasining Konstitutsiyasiga o‘zgartishlar va qo‘shimcha kiritish to‘g‘risida”gi O‘zbekiston Respublikasi qonunini ko‘rib chiqishdan boshladilar. Mamlakatimizning Asosiy qonuniga tuzatishlar O‘zbekiston Respublikasi Prezidentining 2016-yil 21-oktabrdagi “Sud-huquq tizimini yanada isloh qilish, fuqarolarning huquq va erkinliklarini ishonchli himoya qilish kafolatlarini kuchaytirish chora-tadbirlari to‘g‘risida”gi farmoniga hamda 2017-yil 21-fevraldagi “O‘zbekiston Respublikasi sud tizimi tuzilmasini tubdan takomillashtirish va faoliyati samaradorligini oshirish chora-tadbirlari to‘g‘risida”gi farmoniga muvofiq kiritilmoqda.  Muhokama chog‘ida senatorlar ta’kidlaganlaridek, qonun 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilab berilgan vazifalarni ro‘yobga chiqarishga qaratilgan prinsipial qoidalardan iborat bo‘lib, ularda fuqarolarning huquq va erkinliklarini ishonchli himoya qilish kafolatlarini kengaytirish, odil sudlovga erishish darajasini, sud ish yurituvining samaradorligi va sifatini oshirish, nomzodlarni tanlash va sudyalar lavozimlariga tayinlash tizimini yanada takomillashtirish sud-huquq sohasida olib borilayotgan islohotlarning muhim yo‘nalishlari sifatida mustahkamlab qo‘yilgan. 
30.03.2017 | 12:53 Xalqimizning roziligi – barcha yutuq va marralarimizning asosiy manbaidir
O‘zbekiston Respublikasi Prezidenti Shavkat Mirziyoyev joylarda amalga oshirilayotgan bunyodkorlik ishlari, olib borilayotgan islohotlar jarayoni, yirik loyihalar bilan tanishish va xalq bilan muloqot qilish maqsadida 28-mart kuni Navoiy viloyatida bo‘ldi.  Mustaqillik yillarida Birinchi Prezidentimiz rahnamoligida Navoiy viloyatida ulkan bunyodkorlik ishlari amalga oshirildi. Navoiy viloyati haqida gap ketganda, avvalo, uning mehnatkash xalqi, yer osti va yer usti boyliklari, ulkan iqtisodiy salohiyati ko‘z oldimizda namoyon bo‘ladi. Mamlakatimizning yirik sanoat hududi hisoblangan ushbu viloyatda konchilik, metallurgiya, kimyo, energetika, qurilish materiallari, paxta tozalash, oziq-ovqat sanoati izchil rivojlanmoqda.  Hozirgi kunda viloyatda 17 yirik sanoat korxonasi faoliyat ko‘rsatmoqda. Navoiy kon-metallurgiya kombinati, “Navoiyazot”, “Qizilqumsement”, “Navoiy issiqlik elektr stansiyasi” aksiyadorlik jamiyatlari va “Elektrkimyozavodi” qo‘shma korxonasi shular jumlasidandir. “Navoiy” erkin iqtisodiy zonasidagi 18 korxona tomonidan 100 dan ortiq turdagi raqobatbardosh mahsulotlar ishlab chiqarilmoqda. 
28.03.2017 | 12:09 Prezidentimiz Shavkat Mirziyoyev Navoiy viloyatiga keldi
 O‘zbekiston Respublikasi Prezidenti Shavkat Mirziyoyev joylarda amalga oshirilayotgan bunyodkorlik ishlari, olib borilayotgan islohotlar jarayoni, yirik loyihalar bilan tanishish va xalq bilan muloqot qilish maqsadida 28-mart kuni Navoiy viloyatiga keldi.   Mustaqillik yillarida Birinchi Prezidentimiz rahnamoligida Navoiy viloyatida betimsol bunyodkorlik ishlari amalga oshirildi. Navoiy viloyati haqida gap ketganda, avvalo, uning mehnatkash xalqi, yer osti va yer usti boyliklari, ulkan iqtisodiy salohiyati ko‘z oldimizda namoyon bo‘ladi. Mamlakatimizning yirik sanoat hududi hisoblangan ushbu viloyatda konchilik, metallurgiya, kimyo, energetika, qurilish materiallari, paxta tozalash, oziq-ovqat sanoati izchil rivojlanmoqda.   Hozirgi kunda viloyatda 17 yirik sanoat korxonasi faoliyat ko‘rsatmoqda. Navoiy kon-metallurgiya kombinati, “Navoiyazot”, “Qizilqumsement”, “Navoiy issiqlik elektr stansiyasi” aksiyadorlik jamiyatlari va “Elektrkimyozavodi” qo‘shma korxonasi shular jumlasidandir. “Navoiy” erkin iqtisodiy zonasida 18 korxona faoliyati samarali yo‘lga qo‘yilgan bo‘lib, ular tomonidan 100 dan ortiq turdagi raqobatbardosh mahsulotlar ishlab chiqarilmoqda. 
28.03.2017 | 12:05 Xalqimiz bunyodkorlik salohiyatining amaliy ifodasi
Prezidentimiz Shavkat Mirziyoyev 25-mart kuni poytaxtimizda amalga oshirilayotgan bunyodkorlik ishlari bilan tanishdi.  Istiqlolning har bir yili ulug‘ bunyodkorlik ishlari, mamlakatimizning har tomonlama yuksalish dovonlari bilan mustaqil Vatanimiz tarixiga zarhal harflar bilan bitilmoqda. Go‘zal poytaxtimiz Toshkent ham tarixiy jozibasini saqlagan holda yangilanib, uzoqni o‘ylab tuzilgan reja asosida izchil rivojlanib, zamonaviy megapolisga aylanmoqda. Muhtasham inshootlar, turar joylar, ijtimoiy obyektlar, yo‘l va ko‘priklar, so‘lim bog‘ va xiyobonlar barpo etilmoqda.  Birinchi Prezidentimiz Islom Karimov rahnamoligida poytaxtimizda ulkan bunyodkorlik ishlari amalga oshirildi. Zamonaviy shaharsozlik namunalari asosida barpo etilgan ko‘plab inshootlar shahar ko‘rkiga ko‘rk qo‘shmoqda. Yangi turar joylar, ijtimoiy obyektlar, yo‘l va ko‘priklar shahar ahli va mehmonlariga keng qulaylik yaratayotir.  Bunday ezgu ishlar Prezidentimiz Shavkat Mirziyoyev tomonidan zamon talabiga rioya qilgan holda izchillik bilan, tizimli ravishda davom ettirilmoqda. Poytaxtimizda aholi uchun yanada keng qulayliklar yaratish, transport harakatini tartibga solish borasida ulkan ishlar amalga oshirilmoqda.  Mamlakatimizda, ayniqsa, poytaxtimizda transport vositalari ko‘payib bormoqda. Bu odamlarimizning turmush darajasi yuksalayotgani, yurtimiz yildan-yilga farovonlashayotganining isbotidir. Zero, keng ko‘lamli islohotlardan ko‘zlangan maqsad ham aholi turmush darajasini oshirish, inson manfaatlarini to‘la ta’minlashdir. 
26.03.2017 | 10:58 Shavkat Mirziyoyev: mahalla aholisi bir oila kabi ishonchli, mustahkam rishtalar bilan o‘zaro uzviy bog‘lanishi kerak
Prezidentimiz Shavkat Mirziyoyev Yunusobod tumanidagi Uvaysiy nomidagi mahallada bo‘lib, bu yerda fuqarolar yig‘ini xodimlari, profilaktika inspektori va aholi uchun yaratilgan qulay sharoitlar bilan tanishdi.  Mahalla fuqarolar yig‘inlari o‘zini o‘zi boshqarishning chinakam xalqona instituti sifatida jamiyatimizdan mustahkam o‘rin egallagan. Bu xalq bilan muloqot qilish va inson manfaatlarini ta’minlashga qaratilgan ezgu vazifalarni amalga oshirishda muhim ahamiyat kasb etayotir.  Davlatimiz tomonidan mahallalar o‘z zimmasidagi vazifalarni samarali bajarishi uchun huquqiy asoslar bilan birga, yetarli shart-sharoitlar ham yaratilmoqda. Uvaysiy nomidagi mahallaning yangidan bunyod etilgan markazi bu boradagi ishlarga yorqin misoldir.  Mahalla hududida asosan ko‘p qavatli uylar joylashgan. Ushbu turar joylarda yashaydigan 5 ming 400dan ortiq aholi orasida turli millat vakillari bor. Yangi mahalla markazi odamlarni o‘zaro yaqinlashtirishga, xalqimizga xos do‘stlik, hamjihatlik, mehr-oqibat fazilatlarini yanada kuchaytirishga xizmat qilmoqda. 
22.03.2017 | 17:41 O‘zbekiston Prezidenti Shavkat Mirziyoyev Qozog‘istonga jo‘nab ketdi
 O‘zbekiston Respublikasi Prezidenti Shavkat Mirziyoyev Qozog‘iston Respublikasi Prezidenti Nursulton Nazarboyevning taklifiga binoan 22-mart kuni davlat tashrifi bilan Ostona shahriga jo‘nab ketdi.   Avval xabar qilinganidek, oliy darajadagi uchrashuv va muzokaralarda O‘zbekiston va Qozog‘iston o‘rtasidagi siyosiy, savdo-iqtisodiy, investitsiyaviy, transport-kommunikatsiya, madaniy-gumanitar va boshqa sohalardagi hamkorlikning bugungi holati va uni yanada rivojlantirish istiqbollari muhokama qilinadi, mintaqaviy va xalqaro masalalar yuzasidan fikr almashiladi. 
21.03.2017 | 12:45 O‘zbekiston xalqiga Navro‘z tabrigi
Aziz vatandoshlar!  Ona diyorimizga barchamiz orziqib kutgan, go‘zal va dilbar fasl – Navro‘zi olam kirib kelmoqda.  Ana shu ulug‘ ayyom – sharqona yangi yil bilan kattayu kichik barcha yurtdoshlarimizni chin qalbimdan samimiy muborakbod etaman.  Mana shu qutlug‘ kunda siz azizlarga, sihat-salomatlik, baxt va omad, oilalaringizga tinchlik-xotirjamlik, fayzu baraka tilayman. 
18.03.2017 | 12:43 O‘zbekiston Prezidentining Qozog‘istonga davlat tashrifiga doir
O‘zbekiston Respublikasi Prezidenti Shavkat Mirziyoyev Qozog‘iston Respublikasi Prezidenti Nursulton Nazarboyevning taklifiga binoan 2017-yil 22-23-mart kunlari davlat tashrifi bilan Qozog‘istonda bo‘ladi.  Oliy darajadagi uchrashuv va muzokaralarda O‘zbekiston va Qozog‘iston o‘rtasidagi siyosiy, savdo-iqtisodiy, investitsiyaviy, transport-kommunikatsiya, madaniy-gumanitar va boshqa sohalardagi hamkorlikning bugungi holati va uni rivojlantirish istiqbollari, shuningdek, mintaqaviy va xalqaro siyosatning dolzarb masalalari muhokama qilinadi. 
15.03.2017 | 13:04 O‘zbekiston va Turkiya Prezidentlari bir-birlarini qutladilar
 O‘zbekiston Respublikasi va Turkiya Respublikasi o‘rtasida diplomatik munosabatlar o‘rnatilganining 25-yilligi munosabati bilan ikki davlat rahbarlari bir-birlarini tabrikladilar.   Turkiya Prezidenti Rejep Tayyip Erdo‘g‘onning qutlovida bunday deyiladi: “Turkiya Respublikasi va qardosh O‘zbekiston Respublikasi o‘rtasida diplomatik munosabatlar o‘rnatilganining 25-yilligi munosabati bilan Siz, Janobi Oliylarini va qardosh O‘zbekiston xalqini shaxsan o‘z nomimdan va Turkiya xalqi nomidan samimiy tabriklayman va ezgu istaklarimni yo‘llayman".   Rejep Tayyip Erdo‘g‘on 2016-yil 18-noyabrda Samarqand shahrida o‘tgan oliy darajadagi muzokaralar chog‘ida o‘zaro munosabatlarni kengaytirish borasida hamkorlikda ishlash to‘g‘risida erishilgan kelishuvlar amalga oshirilishiga ishonch bildirgan, Turkiya mamlakatlarimiz xalqlari farovonligi yo‘lidagi hamkorlikni o‘zaro ishonchli asosda ikki tomonlama, mintaqaviy va xalqaro miqyosda rivojlantirishga tayyor ekanini ta’kidlagan.   O‘zbekiston Respublikasi Prezidenti Shavkat Mirziyoyev qutlovida "1992-yilning mart oyida diplomatik munosabatlar o‘rnatilgandan so‘ng qisqa vaqtda, ya’ni o‘sha yilning aprel oyida Toshkent shahrida Turkiya Respublikasi elchixonasi ochilgan"ini alohida ta’kidlagan. 
14.03.2017 | 12:48 Xalq ishonchi yanada yuksak marralarni egallashga ruhlantirmoqda
Avval xabar qilinganidek, O‘zbekiston Respublikasi Prezidenti Shavkat Mirziyoyev joylarda amalga oshirilayotgan ijtimoiy-iqtisodiy islohotlar, keng ko‘lamli bunyodkorlik va obodonlashtirish ishlari, yirik loyihalar bilan yaqindan tanishish, xalq bilan muloqot qilish maqsadida 10-11-mart kunlari Buxoro viloyatida bo‘ldi.  Davlatimiz rahbari tashrifning birinchi kunida viloyatning iqtisodiy salohiyatini oshirish, aholi bandligini ta’minlash maqsadida amalga oshirilayotgan islohotlar bilan tanishdi. Qishloq xo‘jaligi, yengil sanoat va energetika, transport-kommunikatsiya, tibbiyot va turizm sohalaridagi loyihalarga alohida e’tibor qaratildi. Buxoro viloyatini ijtimoiy-iqtisodiy rivojlantirish, aholi farovonligini yanada yuksaltirish masalalariga bag‘ishlangan yig‘ilish tanqidiy-tahliliy ruhda o‘tdi.  Ushbu tadbirlarda 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi hamda "Xalq bilan muloqot va inson manfaatlari yili" Davlat dasturidagi maqsad-vazifalar o‘z ifodasini topdi. 
14.03.2017 | 12:38 O‘zbekiston Prezidenti va Germaniya kansleri bir-birlarini qutladilar
O‘zbekiston Respublikasi Prezidenti Shavkat Mirziyoyevga Germaniya Federativ Respublikasi Federal kansleri Angela Merkel O‘zbekiston Respublikasi va GFR o‘rtasida diplomatik munosabatlar o‘rnatilganining 25-yilligi munosabati bilan tabrik yo‘llagan.  GFR kanslerining qutlovida bunday deyiladi: “Mamlakatlarimiz o‘rtasida diplomatik munosabatlar o‘rnatilganiga 25-yil to‘ldi. O‘tgan vaqt davomida o‘zaro hamkorligimiz turli sohalarda izchil rivojlanib bormoqda. Germaniya bilan O‘zbekiston iqtisodiyot, xavfsizlik va madaniyat sohalarida, shuningdek, xalqaro tashkilotlar doirasida ishonchli hamkorlik qilib kelmoqda.  Germaniya Federal hukumati O‘zbekiston Respublikasini parlament vakolatlarini kengaytirish, iqtisodiyotni erkinlashtirish va huquqiy tizimni isloh qilishga qaratilgan 2017-2021-yillarda mamlakatni rivojlantirish bo‘yicha Harakatlar strategiyasini amalga oshirishda hamkor sifatida qo‘llab-quvvatlaydi. Shuningdek, mintaqa davlatlari bilan tashqi siyosatning ustuvor yo‘nalishlari sifatida Siz belgilab bergan do‘stona va yaqin qo‘shnichilik munosabatlarini yanada rivojlantirishni Germaniya qo‘llab-quvvatlashini ta’kidlamoqchiman.  Davlatlarimiz o‘rtasida diplomatik munosabatlar o‘rnatilganining 25-yilligi munosabati bilan O‘zbekiston va uning xalqiga tinchlik, erkin va farovon hayot, mamlakatlarimizning o‘zaro hamkorligi yanada kengayishini tilayman». 
12.03.2017 | 12:36 Buxoroda amalga oshiriladigan bunyodkorlik loyihalari muhokama qilindi
 Prezidentimiz Shavkat Mirziyoyev Buxoro shahrida amalga oshiriladigan bunyodkorlik ishlari loyihalari bilan tanishdi.   Birinchi Prezidentimiz xotirasini abadiylashtirish maqsadida Buxoroning markaziy ko‘chalaridan biriga Islom Karimov nomi berildi. Ushbu ko‘cha qiyofasini o‘zgartirish, uning ikki tomonida zamonaviy binolar barpo etish bo‘yicha 3-yilga mo‘ljallangan loyiha ishlab chiqildi.   Davlatimiz rahbari ushbu ko‘cha Islom Karimov nomiga munosib bo‘lishi, qurilish ishlarini salohiyatli pudratchi tashkilotlar bajarishi zarurligini ta’kidladi.   Prezidentimiz Islom Karimov va Ibn Sino ko‘chalari kesishgan joyda bunyod etiladigan Universal sport majmuasi loyihasini ko‘zdan kechirdi.   2018-yilda foydalanishga topshiriladigan ushbu majmuada 15 sport turi bo‘yicha mamlakatimiz va xalqaro miqyosdagi musobaqalarni o‘tkazish imkoniyati yaratiladi. Undan uchta mashg‘ulotlar zali, basseyn, tennis korti, 4 ming tomoshabinga mo‘ljallangan zal o‘rin oladi. Majmua sportchilarni tayyorlash, murabbiylar malakasini oshirish, sport metodikasi bo‘yicha namunaviy markaz bo‘ladi.   Majmuada yozgi va qishki sport maydonlari qurish lozimligi ta’kidlandi. Viloyatdagi sport inshootlarini inventarizatsiya qilish, ularni muayyan sport turiga ixtisoslashtirish, ommaviyligini oshirish bo‘yicha mutasaddilarga tegishli topshiriqlar berildi. 
09.03.2017 | 09:53 O‘zbekiston Respublikasi Prezidenti Sh.M.Mirziyoyev va Turkmaniston Prezidenti G.M.Berdimuxamedovning qo‘shma bayonoti
 Turkmaniston Prezidenti Gurbanguli Berdimuxamedovning taklifiga binoan O‘zbekiston Respublikasi Prezidenti Shavkat Mirziyoyev 2017-yil 6-7-mart kunlari Davlat tashrifi bilan Turkmanistonda bo‘ldi.   An’anaviy do‘stona va o‘zaro ishonch muhitida o‘tgan muzokaralar davomida davlat rahbarlari ikki tomonlama keng ko‘lamli hamkorlikning barcha jabhalari, shuningdek xalqaro maydondagi hamjihatlik sohalari bo‘yicha fikr almashdilar. Tomonlar ko‘rilgan barcha masalalar bo‘yicha qarashlar o‘xshash ekanligini ta’kidladilar.     O‘zbek tomoni Turkmaniston Prezidenti G.M.Berdimuxamedovga Turkmanistonda O‘zbekiston Respublikasining Birinchi Prezidenti I.A.Karimovning yorqin xotirasini abadiylashtirish bo‘yicha amalga oshirilgan chora-tadbirlar uchun samimiy minnatdorchilik bildirdi. Davlat rahbarlari Turkmanobod shahrida O‘zbekiston Respublikasining Birinchi Prezidenti I.A.Karimov siymosi tasvirlangan haykalning tantanali ochilish marosimida ishtirok etdilar.   Prezidentlar muqaddam erishilgan kelishuvlar va imzolangan ikki tomonlama hujjatlarning bajarib borilishini muhokama qilib, siyosiy, savdo-iqtisodiy, ilmiy-texnikaviy, madaniy-gumanitar va boshqa sohalardagi davlatlararo aloqalar rivojining yuqori sur’atini qayd etdilar. O‘zbek-turkman munosabatlarini yangi bosqichga olib chiqishga intilgan holda, Davlat rahbarlari qardosh xalqlar o‘rtasidagi tarixan shakllangan an’anaviy do‘stona va ahil qo‘shnichilik munosabatlarini yanada mustahkamlashga xizmat qiluvchi O‘zbekiston Respublikasi bilan Turkmaniston o‘rtasida strategik sheriklik to‘g‘risidagi Shartnomani imzoladilar.   Tomonlar teng huquqlilik, ahil qo‘shnichilik, o‘zaro foyda, o‘zaro hurmat va bir-birining manfaatlarini inobatga olish tamoyillari asosida keng ko‘lamli hamkorlikni faol rivojlantirish va mustahkamlashni davom ettirishda o‘zaro manfaatdorlikdan kelib chiqqqan holda, ikki tomonlama munosabatlarning shartnomaviy-huquqiy asoslarini, turli darajalarda siyosiy maslahatlashuvlar o‘tkazish amaliyoti va hamjihatlikni yanada takomillashtirish muhimligini e’tirof etdilar.